Humari Be Basi Par Kyun Bhala Taqdeer Roti Hai
Gale Ko Kaat Kar Apne Yeh Kyun Shamsheer Roti Hai
Humare Hum Nahi Ab Yaar Shaamil Hogaya Hum Mein
Haqeeqat Rang Laate Dekh Kar Tabeer Roti Hai
Ghamon Ke Aashiyaanon Mein Khataon Se Bache Hum Hain
Humari Paarsai Dekh Kar Taqseer Roti Hai
Ilaaj Ishq Ke Khaatir Masiha Se Bhi Mil Aaye
Dawa Kuch Rang Na Laayi To Ab Taseer Roti Hai
Kahin Bhi Ghar Nahi Milta Ajab Hoon Be Sar-o-Saamaan
Ae Rehmat Kuch Karam Farma Teri Jageer Roti Hai
Tamanna Rang Laayi Thi Hua Deedaar Sajde Mein
Khuda Ko Dekh Kar Kyun Ab Meri Tasveer Roti Hai
Mohabbat Hi Mohabbat Mein Fana Saroor Hua Aakhir
Yeh Apni Daastaan Rakhte Hue Tahreer Roti Hai