Khuda Ko Raazi Kar Lena Mana Lena Ibadat Hai
Usi Ki Yaad Mein Aansoo Baha Lena Ibadat Hai
Parastish Aaqa Wa Ma’bood Ki Pakki Shariat Hai
Yeh Dono Ki Mohabbat Ko Kama Lena Ibadat Hai
Wisaal-e-Yaar Ki Hasrat Tamanna Qurb-e-Maula Ki
Inhein Ko Qalb Ke Andar Sama Lena Ibadat Hai
Khuda-e-Paak Ka Hardam Tasawwur Samne Rakh Kar
Zamana Bhool Kar Sar Ko Jhuka Lena Ibadat Hai
Tawaaf-e-Khana Ka’aba Ke Khaatir Log Jaate Hain
Hamare Paas Ka’aba Ko Bula Lena Ibadat Hai
Kiya Be Intiha Sajde Magar Shaitaan Kya Paaya
Riya Kaari Se Apne Ko Bacha Lena Ibadat Hai
Nahin Behka Sakega Aapko Yeh Nafs Aye Dawar
Fareb-e-Nafs Se Khud Ko Bacha Lena Ibadat Hai